Andam na ang kalsada,
Magsugod na ang salida,
Muagi na ang mga batang bida,
Pakilid! Mailhan kag kontrabida.
Niining kabuntagon,
Andam kanunay sila sa ilang kaugalingon,
Kay sa matag higayon,
Makatabang kini sa ilang kaugmaon.
Gigakos nila ang kamatuoran,
Nga sila dili kwartahan,
Nga sila murag pinasagdan,
Dili paboran sa kadaghanan.
Niining kabuntagon,
Kon imo silang pangutan-on,
Kon sila ba nagkaon,
Ambot kon matubag nila dayon.
Gihimo nilang entablado,
Ang sidewalk nga bag-ong limpyo,
Sa dapit nga daghang tawo,
Sa dapit nga sila makadisturbo.
Niining kabuntagon,
Sa salidang gipangita karon,
Ang mga batang bida luoy intawon,
Hinaut unta may plot twist ugma puhon.
Hinaut unta.
Jhon Steven C. Espenido, 23, is a creative writer. He loves to create poems that depict human society.
