Badong: Pre, unsa to ingon sa imong misis, dili na daw siya magmahal?
Onyot: Aw, dili ui. Ang iyang giingon, dili na unta mag mahal ang mga palitonon ug kining krudo.
Badong: Aw, kay abi nako mag sabay mo sa mga artista nga nag bulag na.
Onyot: Ngano, murag bag artista atong dagway? Sus.
Badong: Bitaw no, paita karong panahona no. Tanan na lang nisaka, pero atong sweldo tua nagkamang.
Onyot: Pero, at least, atong IQ nag saka na. Hahaha.
Badong: Bitaw, kanang di na ta dali motuo aning mga politiko karon. Cha-cha, pirma, Mindanao republic. Naunsa naman sila…
Onyot: Nagpa-rally pa gyud nga kontra cha-cha, prayer rally daw, pero puro man yawyaw imong nadungog.
Badong: Ug paghuman atong rally, asa man sila aning paglunop sa Dabaw ug Butuan sab aha? Unya didto gihapon sila nag focus ba, kanang lahion ang Mindanao. Pwede unta unya na kanang maghisgot og politika? Daghan kinahanglan og hinabang ba.
Onyot: Bitaw, kini pod mga tawhanan, gusto nga ibuwag ang Mindanao kay wala daw tay nadawat nga hinabang. Pero mangutana ko, kung maglahi ang Mindanao, asa man ta mangitag kwarta? Mo-enter ba dayon mga tawo ug mga negosyo? Wala na gani tay masudlan nga trabaho. Wala na gani tay matikad nga yuta, kay mga umahan gihimo nang mining o gihimo nang subdivision.
Badong: Kini pod mga politko, ginapabor ang dakong negosyo. Makapa-uswag daw ning mining para sa atoa. Mag tanom daw ta og saging ug oil palm. Pero tan-awa karon, na opaw na ang bukid, nag grabe ang landslide, mao na nalubong mga tawo dinha sa Masara.
Onyot: Kita hinuon ang naalaot. Unya kapoy mominaw sa mga rason nga dili daw tungod sa mining ang hinungdan sa landslide, nga klaro man nga delikado na ang lugar tungod sa binuhatan anang mining ug logging. Kay ngano man naga-opaw na ang lasang?
Badong: Mao ang angay diay isinggit kadalanan, dili no to charter change. Dapat, no to climate change.
Onyot: Korik. Pwede pod, change the mindset. Change the system. Kung dili pod mousab ang mindset sa mga tawo, ma erase na ang Mindanao pati Pilipinas sa mapa oi. Dapat love Mother Earth.
Badong: Pero taym pa, unsaon man atong Valentine’s karon, wala man tay sapi.
Onyot: Balik gihapon ta sa atong forever nga motto: Bahala saging, basta labing. Dili ta permi mag noodles o de lata kay maka high blood. Ta, maglung-ag ta.
(MindaViews is the opinion section of MindaNews. Tyrone A. Velez is a freelance journalist and writer.)
