Hala! Si Tatay, nagyamayama na pod si Tatay
Nagyawyaw nagtagawtaw, lagsik ang laway.
Ngano intawon dili na lang siya mopahuway?
Wala pa ba diay siya matagbaw?
Gimingaw pa ba gihapon siya sa hugyaw
sa panon sa mga nalingaw sa iyang mga tinagawtaw?
Lain na sab ang iya karong paukyab
ug niini naay uban igo ra nanghuy-ab,
wala ma-impress sa iyang kitab-kitab.
Tay, maluoy unta ka sa imong kaugalingon,
igo na tawon tong gihimo mo sa imong panahon
nga wala pa mi maulii hangtod karon.
Ayaw na tawon mi ibanlod sa laing samok,
pangita na lang og suok diin ka makasuksok
paglikay niadtong mga buot kanimo motulisok.
Pasagdi na lang mi nga tiyan nagkutoy ug dagway nagkulismaot
sa presyo sa bugas nga lisod na namo maabot,
magsagubang sa kaugmaong igo na lang tingali namo ipangambot.
Eric S.B. Libre
6 Pebrero 2024