Ang mga hawod
nagkarambola na pod,
haskang kasamok!
Pero wala ko kasabot
nganong sila nagubot.
Silay kauban
di pa lang dugay, di ba?
Naunsa na man
karon sila nag-away,
karon sila nag-unay?
Kitang mayukmok
igo rag sunodsunod
sa makaguyod,
sa hawod nga mas hawod
mas hawod nga moguyod.
Sunod-sunod lang?
Magpaguyod na lang?
Bahalas Batman
unsay atong dangatan,
badlis sa kapalaran?
Hay, politika!
Lana-lanahan ra ta,
palaomon pa,
palamiag estorya.
Haskan na lang ilara!
Parehas sila,
iyahay maniobra
nga makabenta
samot magamhanan pa,
samot makapanguwarta.
Ug kita antos
sa saad nangapan-os,
basin masantos
sa padayong kakabos
antos lang gyod ta, antos!
Apan bantay ta
basig kana drama ra,
lipat-lipat ba.
Hawod baya na sila
nianang paagiha….
Eric S.B. Libre
31 Enero 2024