Onyot: Galawgawa ani oi.
Badong: Ngano man pre?
Onyot: Nagpirma ko, karon dili diay mao?
Badong: Unsa diay imong gipirma? Nagpakasal na ka?
Onyot: Dili ba, kadtong usa ka adlaw ba, naay nilibot dire unya nangayo og pirma nato sa barangay, unya naa daw pahalipay ihatag daw namo.
Badong: Nan, karon, ngano nagproblema man ka?
Onyot: Nasuko si Congressman, ingon siya dili daw to iyaha.
Badong: Kay kinsa man diay to?
Onyot: Kadto man tong alyado niya niadtong eleksyon. Pero karon murag dili na sila alyado, kay nasuko man.
Badong: Taym pa, unya nakadawat mo sa inyong pahalipay?
Onyot: Wala gani kay wala na sila nibalik, murag di nato mosuroy dire dapita kay napangka na ni Cong.
Badong: Hay, kataw-anan man ni atong layp karon.
Onyot: Ngano nakasulit ka ani pre?
Badong: Kay ang atong layp karon, sige na lang tag hulat kung kanus-a sila maghatag og pahalipay.
Onyot: Naglagot ka pa ka atong nag linya ka sa ilaha niadtong Pasko unya wala kay nadawat?
Badong: Wala pa ko ka get over ato. Imagine ha, upat ka oras ko nitindog didto sa ilahang tugkaran. Nabinhod na akong tiil, nitukar na akong “araytis.” Unya taas gihapon ang pila! Naghunahuna ko, ataya, di na ko kabaktas pauli aning style. Bahala na way pahalipay, basta walay yayay.
Onyot: Nag antos na lang gani ko ato, maayo na lang naa tay pang salo-salo sa Pasko.
Badong: Unya, paglipas sa New Year, tinga na pod. Haha.
Onyot: Mao bitaw pre, mao ni atong layp, naghulat lang ta kanus-a sila mag hatag. Kadtong pandemic, kaduha ra ko nakadawat. Kung naay ma ospital, mag pila na pod ta sa ilang opisina. Dili lang unta mabasol sa mga galamay ni Cong kung ngano nagpirma ko, kay abi nako part na sa atong layp.
Badong: Mao bitaw, unya ayahay gani unta kay sila ang miduol. Dili na ka mag pila.
Onyot: Pero pre, wala gyud ko kasabot, ngano nasuko si Cong.
Badong: Ngano bitaw?
Onyot: Naa to sa iyang Facebook, misulti siya nga kadong pirma para daw to sa charter change.
Badong: Cha-cha na pod!
Onyot: Mao bitaw to naa sa papel na akong gipirmahan, naa to nakabutang nga pabor ba ka nga usbon ang unsa to, Contitstusyon?
Badong: Constitution! Naa pod ning mga style sa mga Cong nga ambot gusto sila mag usab sa batakang balaod.
Onyot: Ngano bitaw no, halos kada tuig naman ning mag sige lang silag hisgot og cha-cha. Pero naay uban dinha sa ilaha, hilabi na kadtong artista o mga sikat lang niadtong eleksyon, wa gani kabalo unsa ang naa sa constitution!
Badong: Sa dagan sa balita, ang gusto daw sa Kongreso karon kabahin aning cha-cha, tugutan daw ang mga dakong negosyo sa gawas nga mopalit sa atong yuta.
Onyot: Ngano daw kini ilang gihuna-huna?
Badong: Aron daw mag sulod ang negosyo, ug makasapi daw ta.
Onyot: Ui, dollars na.
Badong: Unya dollars lagi, pero wala na kay luna!
Onyot: Pero mao naman nagahitabo karon. Nag laray na gani mga imported nga mga gamit sa mall. Duna na mga dakong korporasyon ug bangko niabot na dinhi.
Badong: Pero ngano man dili nato ni tugutan sa una? Ngano karon gusto na nila?
Onyot: Mao pod. Kay kung sila na manag-iya ani sa atong yuta ug negosyo, sila na magbuot. Mura tag skwater sa kaugalingong yuta. Pero Iningles lang sila.
Badong: Oh Ininsik.
Onyot: Murag kasabot na ko, pre. Kay panangllit, ngano isyu man tong supak ta sa mga barko sa China nga nagpalayas sa atong mga mangingisda sa West Philippine Sea. Ngano mag isog-isog sila? Kay ato man ning teritoryo. Kita man angay magpahimulos sa atong bahandi.
Badong: Korek. Mao nang giingon, Love the Philippines.
Onyot: Pero dili man ing ato pagka explain ni Cong ngano dili sya mosugot sa cha-cha.
Badong: Gi-unsa diay niya pagka-explain, pre?
Onyot: Miingon lang man siya nga ang boto nato not for sale.
Badong: Murag ba dili kini ang nagahitabo kada eleksyon, kanang KIBOT—kwarta, ilimnon, bugas, odong, tinapa.
Onyot: Basta, dili na ko mopila ana sa ilaha, dili na ko magpailad.
Badong: Bantay lang ha inig eleksyon ha, hapit na.
Onyot: Basta, I’m not for sale. For hire na lang. Kinahanglan tag mamugas!
(MindaViews is the opinion section of MindaNews. Tyrone A. Velez is a freelance journalist and writer.)
