Kaadlawon nga tugnaw
taudtaod pa mogitib ang adlaw
nanag-awit panon sa mga tawo
sa kalye nga mingaw pa nagsubay paglakaw
prosesyon nangaliya nagsangpit kang Senyor Santo Niño.
Gikan sa trompa sa masjid sa unahan
daw namukaw sa tibuok kalibotan
milanog ang tingog sa pag-ampo sa imam
nagsangpit nagdayeg kang Allah halangdong ngalan.
Ang iro sa silingan niuwang pinakalit
mora ba og niduyog sa pag-awit ug pagsangpit
ug dunay panon sa mga iro nga nagkorus pag-usig
nagkaguliyang, nagkayuring sa pag-usig
samtang prosesyon ug imam padayon nangaliya nagsangpit
ngadto sa inanay nagkahayag nga langit.