Wala na si Mandela
apan sa iya magpasalamat ‘ta
sa matarong ug kalig-on
nga gitudlo niya
dili ordinaryo, dili basta-basta
bililhon, wala’y sama
kinsa kanato adunay baruganan
nga sama kaniya
o musunod sa iyang giya
dili ba kaha ikaw matumba
puno sa kasilag
sa imong kontra
makahimo kaha pag-pasaylo
pagkalimot sa kasakit nga nahiagoman
tungud ug alang sa nasud
nga nagbaguod sa inhustisya
ug kalisod
pagkadakong hagit
daw gilamoy sa kalayo’ng init
apan aduna’y usa ka tawo
midasdas sa dalan
aron mahatag sa katawhan
ang gidamgong kagawasan
Mandela, dili ka hikalimtan.